Přepis regestovaného dokumentu

Ich clage euch obir Cunrad von Hoburg, ern Hanns sin son, das sy mir habin und meynen mannen usr yrem hause von yrem byre und brothe lassin etnsagin. Nach dirselbin entsagunge sye ouch dieselbin meyne fynde gehausit und gehegit haben et cetera und derselbe ritter Hoburg, dem mein auch nicht recht noch wandils helffen woulde, zu meyn finden uff denselben yren hofe. Sundir yre knechte und hofleute und yre schutzin houlfin yren finden wider mich und die meyn, das alles uns zu schaden gischen ist, in gütlichem gescheffte unbewart yre ehren. Bitte ich euch, libin fründ und nockber, als mir denn ein sulichs uss euwir pflege gischeen ist, das yr denselben Hoburg und seyn sohn undirweisen welt, das sy mir wandels umb eyn sulches pflegin weldin nach euwerim, Hanns von Polentz, land und stete dirkentniss, daran mir wol genugin sol et cetera. Ouch clage ich euch sundirlichin obir den ritter, das der mir mein hauptman von Fredland schild widir recht. Kündet yr yn undirweysin, das er mir vorwandilte umb sulche brüche, dye er keyn mir und meynem houptman und den meyn gethan hat in gütlichem gescheffte et cetera. Würde er denne icht schulde wedir habin zu meinem houptman, der wirdt sich wol kein ym vorantwortin als ein bedirman et cetera. Gegebin zum Forst am donnerstag nach Andree.

Wentzlaw von Bebirstein, herre zu Fredland und zum Forst, ad nobilatem et senatus Hexapolitanorum.