Přepis regestovaného dokumentu

Ich Sigmund Junckher zu den czeiten zu Wiltstein gesessen Bekenne fur mich mein Eliche hawsfraw all vnsere Erben vnd nachkomen offenlich an disen brife vor allen den die insehen aber horen lesen, das wir vnsern getreyd czehenden vnd auch den clein czehenden den wir auf dem dorffe zu nehern Voydersrewt haben gehabt in allermass vnd wir den Inne gehabt vnd herbracht haben vnd als der an vns komen ist, haben redlich vnd recht vnd erbiclichen czukauffen geben vnd verkaufft dem Ersamen weisen Niclasen Gumerawer Burger czu Eger seiner Elichen hawsfrawen vnd allen seinen Erben vnd nachkomen vmb ein Summa geldes dy sy vns bereit beczalt vnd awsgericht vnd die wir an vnsern fromen vnd nucz gelegt vnd gewendet haben vnd wir geloben In denselben czenden czuuertreten vnd czuuersprechen vnd von allen ansprachen gein allermenyclich zufreyen zculedigen vnd zu entwerren Jar vnd tag als Stat vnd lanndes recht ist vnd gereden auch daz wir all vnsere Erben vnd nachkomen furbas ewiclich nymermer keinerley zuspruch noch ansprach dorczu noch dernach sullen wollen noch mugen gehaben weder mit geistlichen noch werltlichen rechten noch in keinerleiweise on alle geuerde vnd des alles zuvrkund hab ich obgenanter Sigmund Junckher mein eygen Insigel vnden an disen brife gehangen vnd zu merer geczeivknus hat mein liber Bruder Rudiger Junckher Burger des Innern Rates zu den czeiten zu Eger durch meiner pete willen Im on schaden sein Insigel czu dem meinen an disen brife gehangen. Der geben ist an sand laurenti tage Nach cristi geburt virczenhundert vnd Im Newnvndczweinczigisten Jare.