Přepis regestovaného dokumentu

Wyr Jan von Crawarn herre czu Ticzin und rechter erpherre der gutter czu Fulnecke thun kunth allermenyclich mit dysem bryffe, das vor uns komen sein dy erbern und weysen unser liben getrewen purgermeister, gesworen und dy gancze gemeyn unser stat czu Fůlnecke und brachten uns eynen bryff mit eynem anhangenden yngesigel, den en gegeben hatte der edeler herre herre Benesch der alde unser liber vetter eynes seligen gedechtnus, der was von des anfalls twegen und der laut und sprach in dyse warth:

Wir Benesch von Crawarn des romischen konigs camermeyster czu den czeiten tun kunt allermeniclich mit disem priffe, das wir haben angesehen die trew und die lib unser armen leut, voytes und der scheppen und der ganczen gemayn unser stat czu Fulnek, di si czu uns und unsern gerben gutlichen tragen und durch besunder libe willen, di wir czu yn gnediclichen haben, so tun wir yn und iren gerben und nochkömlingen dise gnad, di hernach geschriben stet, das wir si ledik lasen alles annalles und angestorben gutes, das wir ader unser vorfordern haben genumen bis an dise czeit, des sullen si ledik sein nu und ewiclich von uns, unsern gerben und von allen unsern nachkomen unczuprochenlich und ungehindert, das si di stat mauer disder fleisiger und liber sullen pauen, in sulcher mas, ap ymand in derselben unser stadt schid von diser werlt, er sey man ader fraw an gerben, so sal sein gut und hab an den nesten freunt, der do auf unserm gut siczt, gevallen. Wer aber sach, das der selb frunt auff eins andern hern gutses, so sal her sich dorczu czihen und sich sein underwinden, weld her aber des nicht tun, so sal ym seines frundes angestorben gutes nichtes nicht volgen, sunder es sullen sich des gutes, aber ab ein man ader fraw an frund sturb, di schepphen der selben unser stat underwinden und das selb auf der stat frummen und nucz wenden und kern des pesten si mugen, noch iren guten trewen. Der auf genanten unser gnad di wir yn haben getan, czu einer gröszer sicherheit hab wir yn disen priff mit unserm anhangendem insigel vorsiglt, bestettigt und bevestent, der do geben ist noch gotes gepurt dreyhundert iar und tausent iar, in dem acht und achczigsten iar an dem nesten donrstag noch der derhebung des heiligen creuces.

Dorumme auch wir vorgenanter herre Jan angesehen haben grosse schaden, dy unser getrewen und lyben Fůlnecker entphangen haben fewerzs halben von gewaldiger hanth, wolden sy domit auch mit ander sunderlicher genad dergeczczen, das sy dy stat desder bas pauen und beseczen möchten, haben wir sy auch alles anvalls frey und ledig gelossen von uns und allen unsern nachkömlingen yn sullicher weyz und mas alz der alde bryff unsers vetters laut und spricht und den selbigen alden bryff bestettigen und krefftig und machtig machen yn allen articeln, bůnden und stůcken mit kreften dyss bryffs. … Des czu eyner sicherheit und bestetunge hab wir dysen bryff losen vorsigeln mit unserm insigel, der do geben ist auff Strollenberg am Freytag nach Stanislai nach Cristi geburth virczehenhundert yar und yn dem neunden und czwenczigisten iar. Dobey seint gewast dy edlen und namhaftigen Janak von Turkaw, Smyl von Dubrawicz, Jan von Katcendarff, und Wenceslaus schreiber.