Přepis regestovaného dokumentu

Ich Hans Lange purger zcu Eger bekenne offenlich an diesem briefe allen den die in sehen hören oder lesen, das ich mit guten freyen aygen wolverbedachten mute und willen, dem erbergen manen Niclasen Gumerauer auch purger hie zcu Eger umb ayn summa gelts der er mich genczlich und gar hat gerichtet geweret und beczalet und die ich an meinen fromen und nocz hab gelegt und gewendet auff mein haws und gartten an eynander gelegen, daz ich hab vor dem oberutor gegen dem heiligen crewcze zwischen des Albrecht Hůlers und des Walther Peyssers hewsern und gartten gelegen darynn ich yczund sicze und auff alle desselben meins hawses und garttens gepewde poden hofrayte früchte nöcze und zcu gehörunge kaynerlay awszgenomen czehen gute behemische groschen die gemainlicher gute werunge sein ongeuerde und zwu hennen rechtes jerlichs und ewiges erbeczinses, hab redlichen und recht zu rechten erbe erwiclichen zcu kawffen geben und verkawfft; also daz ich und alle meine erben und nachkomen die dasselbe mein haws und gartten in kunfftigen czeiten nach mir ynnen haben und besiczen werden von demselben hawse und gartten und allen iren egenanten zugehörungen dem vorgenanten Niclasen Gumerawer und allen seinen erben und nachkomen oder wein sie iren gewalt mit diesem briefe geben die ebenanten zehen groschen und czwu hennen jerlichs czinses alle jare jerlichen und ewiclichen ye zcu weynachten on allen verczo und on alle wider rede antwurtten czinsen und geben schullen als rechtes erbczinses recht und gewonhayt ist und welchs jares wir dez nicht teten so schůllen sie oder ire poten mit vollem gewald und on alles recht ye in unserm egenanten hawse und gartten ye umb iren versessen czins pfenden oder pfenden lassen als umb alle erbczinse recht ist und gewonhait on alle unsere hinderüsse oder wider rede und wir schüllen allen von dem egenanten czinse ire man sein und vor in zu rechte steen als ander erbczinse und manschafft in der vorstat zu Eger recht ist und gewonhait ongeuerde. Und des zcu urkünde und vester warer sicherhait geb ich vorgenanter Hans Lange disen offen briefe mit der ersamen weisen des Conrat Memels und Bernhard Püchelpergers die czeit payde des ynnern rates zcu Eger insigeln versigelt und die haben sie von meiner fleissigen pete wegen des zcu geczewcknüsse in on schaden und on entgelt gehangen an disen briefe. Der geben ist an unser liben frawen abende concepcionis nach Cristi unsers herren gepůrte czale vierczenhundert und dornach in dem vierundczwainczigisten jare.