Přepis regestovaného dokumentu

Ich Hanns Mullner der taschner, diezeit gesessen am Alten kolmarkt ze Wienn, und Dorothe, sein hausfrau, Matern des kürsner seligen tochter, die emaln maister Andren den taschner von Prag auch elich gehabt hat, vergeben, für uns und all unser erben, und tun kund offenlich mit dem brief allen, den er fürkumbt, daz wir unverschaidenlich gelten süllen rechter und redlicher geltschuld, den ersamen geistlichen herren, den cartusern von Prag und iren nachkomen sechzehen schokch gross alten Prager münnss, die sy uns berait zu unser notdurfft gelihen habent, die wir in und auch der egenant maister Andre der taschner seliger vor langer zeit ausgericht und bezalt solten haben, daz wir aber von armut und eehafter not wegen datzemalen und auch yetz zu bezalen nicht haben vermügen, davon so geloben und verpinnden wir uns und all unser erben gegen den vorgenanten geistleichen herren und iren nachkomen mit unsern treun wissentlich in krafft des briefs, daz wir in die vorgenanten sechtzehen schok gross an all widerred und auszüg unvertzogenlich ausrichten und betzalen sullen und wellen, wenn das ist, daz von schikchung des allmechtigen Gots am gemainer frid und kristenlicher gelauben zu Behem wider bestettigt wirdet, und wir oder unser erben wider ze unserm erbgut komen und ingesetzt werden an alles gever. Und zu ainer pessern sicherhait so haben wir in mit gutem willen unbedwungenlich darumb zu ainem rechten fürphant gesatzt unser zway heüser, ains gelegen zu dem Kutten auf dem Perg in der stat bey der hohen kirchen zenagst maister Kristans des goltsmids haus, und das ander zu Prag in der Neun stat am graben zenagst dem Parreuter, und ob wir oder unser erben dahin nicht kemen, noch ingesatzt wurden, das dennoch die heüser ir fürphant sein, mit solher beschaiden ist, daz wir oder unser erben die vorgenanten geistlichen herren oder irem anwalt, der den brief von iren wegen innhat, die obgenanten sechzehen schokch nicht ausrichten und bezalen, wann solhe zeit ze schulden kümbt, als vorgeschriben stet. So ist das unser gütleicher will und süllen sy dann gantzen und vollen gewalt haben mit den vorigen zwain heüsern irn fürphannten allen iren frumm ze schaffen mit verkauffen oder versetzen, wenn sy wellen so verr, das sy des vorgenanten irs gelts und ob sy des icht schaden nement gantz und gar davon verricht und gewert werdent ungeverlich, girig in aber daran icht ab, das süllen sy haben zu uns and allen unsern erben unverschaidenlich und auf allem unserm gut, das wir yetz haben, oder hinfür gewinnen, und hinder unser lassen, es sey erbgut oder varundgut, wie das genant oder wo das gelegen ist, nichts ausgenomen und des davon bekomen, so sy nagst und pesst mügen, wir seien lembtig oder tod. Mit urkund des briefs besigilt mit des erbern herren maister Cristans Fröwin, lerer in der ertzney und des erbern Jörgen Pruntaler burger ze Wienn anhangunden insigiln, die wir zu gezeugnüss der sach mit vleiss darumb gebeten haben in und irn erben an schaden. Darunder wir uns mit unsern treun verpinnden alles das stetzuhaben sovorgeschriben stet. Geben ze Wienn an Mitichen vor sand Gallen tag nach Cristi gepurd virzehenhundert jar darnach in dem zwayunddreissigistin jare.