Přepis regestovaného dokumentu

Wir Sigmund von gotes gnaden romischer keiser, czu allen ziten merer des reichs vnd czu Hungarn, czu Behem et cetera kunig, embieten den ersamen probst, dechant vnd dem ganczen capittel, mannen vnd steten der kirchen vnd stifftes zu Bresslaw, vnsern lieben andechtigen vnd getruen, vnser gnad vnd alles gut, ersamen lieben andechtigen vnd getruen, wir haben eigentlich vernomen, wie der erwirdig Conrat, bischoff czu Bresslaw, vnser lieber oheim, furst vnd andechtiger, das slos Otmachaw, das dem stifft czu Bresslaw czu gehoret, vnd das newlich mit der hilffe gotes vsz der fynt gewalt wider czu demselben stifft komen ist, vnderstee vnd willen hab czu brechen, vnd das daruber vil teding vnd rede geholden worden sein, das wir czumal vngern gehort vnd ein missefallen daran haben, nach dem vnd dasselbe sloss ein trefflich stuck vnd grosse zuflucht des ganczen stifftes ist, sunderlich nachdem vnd es nu von den feynden trefflich gevestent vnd gewessert ist, also das dem ganczen lannd, wo man das bewart, vil gutes davon beschehen mag, vnd sunderlich ouch nach dem vnd wir als ein kunig zu Behem desselben slos ein oberster lehenher sein, were vns gancz wider, solte vns soliche treffliche lehenschafft geswecht werden. Und dorumb begern wir von euch mit ganczem ernst, ir wollet gen dem egenanten bischoff also daron sein vnd dorczu weisen, damit er das egenannte slos in keinen weg breche nach zustoren gestatte, sunder das besecze vnd bas darczu sehen lasse vnd solich achtung doruff habe, das das bewart werd, alsdann mit der hilffe gotes gut zu bescheen ist, doran tut ir vns ein wolgefallen vnd dem stifft vnd euch allen einen frumen. Geben zu Prespurg an dem suntag Judica in der vasten vnserr reiche des hungrischen et cetera im 48., des romischen im 25., des behemischen im 15. vnd des keysertumbs im andern iaren.

Ad mandatum domini imperatoris Caspar Sligk, miles, cancelarius.