Přepis regestovaného dokumentu

Friderich und Sigmund, gebruder, von gots gnaden herczogin zcu Sachsen und marcgraven zu Missen. Unsern grus zcuvor! Ersamen und wysen liben besundern! Wann uns iczunt mehir dann eyns warhafftige botschaft komen ist und tegelichin komet, wy das die kecczer, die nest hy in unsern landen gewest syn, sich widder umb her zcu unsern landen keren und nehen und das dy, die nach zcu Behemen ym lande synt, nemlichin dy Preger und andirr stete, mit ganczer macht uff synt und in grosser sampnungen denselbin, dy hy dissit waldes gewest und nach synt, under ougen und zcuhulffe zcihen und meynen, mit alle irer macht in unser lande zcuczihen und die gruntlichin zcuvorterben, des wir yn doch mit der hulffe des almechtig in got, uwer und unser heren frunde, manne und stete rate und bistendikeit wol czu irweren hoffen: davon begern wir von uch mit ganczem flisse, ir wollet in dissen noten und sachen gein uns thun, als wir dann vor gein uch gethan habin und nach thun wolden. Und wollet uns uwern reysigin geczug, so meist ir des ymer uffbrengen und gehabin mogit, uff den sonabind noch sente Mertins tage gein Czwickaw senden und bestellen, das sy mit den unsern furder reyten. Und wollet uns ouch mit den uwern hernach, ab es not syn wurde, mit alle uwer macht folgin und zcuhulffe komen und uns des nicht vorsagin noch in dissen noten lassen, als wir uns des genczlichin zcu uch versehen, das wollen wir in eynem solichin und grossern gerne umb uch widder vorschulden und y nicht vorgessin. Gegebin zcu Missen am sontage nest noch Symonis et Jude under unserm Sigmundes insigil, des wir Friderich uff dismal mit ym hiran gebruchen, anno et cetera xx nono.