Přepis regestovaného dokumentu

Barbaren weilent Reichels kramer burger der grossen stat zu Prag <weisung> gescheft

Desselben tags des eritags vor sand Matheus tag des zwelfboten komen für den rat der stat ze Wienn Niclas Krabat und Niclas Burger, baid burger ze Wienn, und habent da gesagt, der egenant Niclas Krabat bei seinem treun an aides stat und der vorgenant Niclas Burger bei seinem starkchen aid, zu rechter zeit, als si zerecht solten, umb das geschefft, so Barbara, weilent Reichels kramer burger der grossen stat ze Prag witib, an irn lesten zeiten getan hat. Von erst hat si geschafft alles ir gut, daz si ze Wienn hat, nichts ausgenomen, ledikleichen dem erbern herren Niclasen von Kosting, alterherren des alters sand Kathrein in der kirchen sand Lienhart der egenanten stat ze Prag auf dem Hünermarkcht, allen seinen frum damit ze schaffen vor menikleichen, als es im wol gewellet und daran in nyemand weder ir freund noch anders yemants hindern noch irren sullen, weder vor geistleichem noch weltleichem rechten. Item und manit und wil auch, daz ir ersts geschefft, daz si ze Prag getan hat, sol beleiben bei seiner kraft, doch also, daz es das gegenwurtig geschefft nichts hinder noch irren an alles gever. Item was si denn Wenczeslabem, irem lieben sun, vor drein jaren hie ze Wienn geschafft hat, des er ain offen brief hat, das sol im also volgen, alsverr si das nicht verczert oder verkumert. Item ob es richtig wurd ze Prag, so schafft sy, daz der alter, den si gestifft und begabt hat in der obgenanten kirchen sand Lienhart in den eren sand Agnesen, nyemanden anders gelihen noch geben sol werden, denn dem obgenanten herrn Niclasen.