Přepis regestovaného dokumentu

Ich Albrecht von Koldicz, hobitman zu der Swidenicz, bekenne, das vor mich komen synt her Jenke von Chotumicz, ern Cunrad Nympcze und haben bekant, das dy sich Gocze Schoffs, uff dem Griffenstein gesessin, gemechtiget haben, und ich Hans Ulrichsdorff ortman zu Gorlicz am andern teile bekenne, das ich mich der von Gorlicz gemechtigit habe, alzo daz der edil von Koldicz eyn namhaftigin tag uff eyne gelegeliche stat machin sal, dorzu Gocze mit synen frunden komen sal, dy von Gorlicz ouch doselbist komen sullen, so sal mir daz eyne teil geben ir frunde dry adir fyer meyns hern des konigis man, daz andir teil ouch so vil meyns hern manne. Dyselben sullen alle bruche und zweitrechte, dy die Gotczin und die von Gorlicz zwischen enandir haben umme strasen, umme gefangin, woranne daz sy, handeln sullin; waz wir denne derkennen noch beyder kontschafft und wissenschaft, wer dy eldir und bessir habn worde nach der kentnisse der sechssir adir achtir unsers hern dez konigis man, waz wir denne dorin sprechin werdin noch unserem besten dirkentnisse, do sal ein itlich teil an genugen lasse, do wedir nicht zu sprechin, sundir stete und gancz haldin sullin, also sich denne beide teil vorwillet haben. Dez zu bekentnisse habe ich Albrecht von Koldicz hobitman zu der Swidenicz, ern Jancka Chotumicz, ern Cunrad Nymptcze, ern Hans von Huburg, Tamme von Gersdorff und Ulrichstorff von Gorlicz also gezuge unsir insigille uff desen uffendin briff lossen drucken, der geben ist zu Offen am donirstage vor Egidy anno domini et cetera 25.