Přepis regestovaného dokumentu

Wir Friderich vnd wir Johannes sein Sone Von Gotts gnaden Marggrafen zu Brandenburg etc. Vnd Burggrafen zu Nuremberg bekennen offentlichen mit diesem brief, für vnns vnnd all vnnsere Erben gen Allermenniglichen, die Jhn sehen, hören oder lesen, Wann wir wolbedacht, vnnd mercklich erkannt haben, solch manchfeltig Verdürblich Vnd gros schäden, So denn Vnnser libe getreue Burgermeister Rathe Vnnd gemeine Reich vnnd Arm gemeinglich vnnser Stadt zum Hofe, Jtzund Von der hußen, mit Name, brante, Vnnd andern sachen genommen, Vnnd empfangen haben, Vnnd wenn wir auch derselben, der Vnsern zum Hofe Auffnemen, bauen Vnnd der genanten Stadt beschüczunge Vnnd beßerung je gerne sehen, daß sie ohne vnnser hülflich frejunge wider zu bauen Vnnd sich zu befesten, nicht vermögen, Vnnd Vnns demüdtiglichen Vnnd fleißiglichen gebeten haben, daß wir sie etliche Jar für alle Steuern vnnd bete freien wolten, Alß haben wier angesehen vnnd erkant solch ihr Verdürblich scheden, name Vnnd brand Vnnd Auch ihr fleißig beten, sie solcher scheden zu ergeczen, Vnnd daß sie desto baß ihr Stadt Vnnd ihr heusser zum Hofe befesten Vnnd gebauen mügen Vnnd sollen, Vnnd haben sie Vonn sonderlichen gnaden gefreiet Vnnd begnadet zehen gancze Jar nechst aneinander kommende, Aller Steuer Vnnd Bete, Freien vnd begnaden sie auch damit inn Crafft diß Briefs, Vnnd zu vrkunde mit Vnnsern annhangenden Jnnsiegel versigelt, der geben ist zu Cadolczburg am Montag nach dem Sonntag Jnvocavit Jnn der fasten, Nach Christi Vnnseres herrn geburte, vierzehenhundert Jare Vnnd darnach in dem dreisigsten Jare.