Přepis regestovaného dokumentu

Ersame wolweisen lieben herren. Meine willige dinste bereit. Geruchit zu wissen uf sulch brive, die ich uch hie von Strubingen gesant habe: das mein allergnedigster herre der Römisch könig mit dem marggrafen von Brandeburg, mit herzog Otten des phalzgraffen bruder bei Riin der sein macht hat, herzog Hannsen, herzog Heinrich, herzogen Wilhelm, herzogen Ernst, herzogen Albrecht, zuvoran mit dem erzbischoffe von Magdeburgk, mit dem bischoffe von Breslaw, mit dem bischoffe von Agria mit herren, ritter, knechten und steten di dese zeit bei sinen gnaden gewest sein eigentlich uf ein ganz worhaftig ende gote zu lobe der cristenheit zu troste beslossin hat, das sie mit irem reisigen gezeug uf das allirsterkste so ir ein iderman ufkommen mag und kan und us den steten und dörfern ie den vierden man ußzurichten in dem felde sein wellen des suntages nehest noch sand Michels tag 1. Oktober schirst zukommende. So wil mein gnediger herre binnen 4 oder 5 tagen kein Norenberg gewißlich et cetera. Und ist also ouch mit in doran bliben, das man von allen orthen umb das land zu Behmen leginde zuzihen sol mit macht et cetera. So wil sin gnade mit sinem eigen leibe mehtzihen bi in sterben und genesin. Und höre ie anders nicht noch solcher beslissunge des ratis, do wir bei gewest sein, das gestritten wird, man möchte denn die kätzer dozu nicht brengen. Dorumb, lieben herren, geruchit ewer ding in guter achte ouch zu haben uch doruf zu setzin und zu schickin mit reisigen pherden mit wagen et cetera, was sich dorzu geboert. Wenn mein herr wil das ir ouch mann und stete mit uns im lande die Slesia Lusitzer land ufsein sollen. Wi wir uns aber mit den zögen halden sullen, umb besurgung der ketzer in der Slesia der possotken umb uns gelegen, das hat unser gnediger herre uns noch nicht gesagit. Und alle die freden mit in haben, di sullen den frede ufsagen oder wil si als kätzer haben. Hierumb, liben herren, bitte ich ewer weisheit sulche sachen in geheime weise nicht offinbar zu machen sundir in ratis weiß zu halden so lang biß das mir gott zu uch gehilft et cetera. Und hoffe das er uns io zu Nurenberg ein gnediges ende ohne vorzihen thun werden. Geschriben eilende zu Strubingen an der metewochen an sand Seligen und Meretag.

Laurentius Erenberg.

Ouch geruchit zu wissen, das der von Colditz unser foyt mit dem bischoffe von Magdeburg geredt hot. So bin ich mit im by sinen gnade gewest, als von der Rakely wegen; was sich do rede vorlouffin hot, das were zu lang zu schreiben, wenn dos es doruff bleben ist, das der bischoff durch seine amechtlüthe mit in bestellin wil, do sy ein stehen mit uch sollen hobin, biss her wedir von sulcher botschafft kumpt, so als mein hern in mit andern fürsten zu der cronung sendit herzog Witulden zu einem konige. Und dorumb, lieben herren, geruchet das sinem houptman zu schreiben kein der Dome, daz unser foyt und ich ein sulchis mit sinen gnade geredt habe, und das uwer weisheit ein stehen mit in leiden, noch der zukunfft des bischoffs 4 oder 6 wochen. Dasselbe auch der bischoff bestellen wil, asl bald her von minem her hen heym kumpt.