Přepis regestovaného dokumentu

Dem edeln herrn Czenken von Wartenberg obirsten Burggrafen der Cron des kunigreichs zu Behem und herrn Vlrich von Rosenberg vnd andern herrn unsern gunnern.

Vnsern dinst zuuor, edle gunstige herren! Als Ew. Gnade vns screibet vnd manet an die trewe dy wir der Cron vnd kunigreiche zu Behmen pflichtig sein, das wir den allerdurchlewchtigisten fursten vnd herrn herrn Sigmund Romischen vnd Ungerischen et cetera kunige furbasmer nicht sullen vndertenig noch gehorsam sein als einen behmischen kunige, weder seinen Amptlewten, vnd vmb das das sein Gnade noch nicht ist von den behmischen herren zu einem kunige gewelt, noch zu dem behmischen kunigreich gekronet wurden et cetera vnd alle die selbe Stucke die ir vns habt in ewerm brifen geschriben gesant, die haben wir wol vornomen. Doruf thun wir ewern gnaden zu wissen: e denn vnsers herrn kuniges gnade kam in das lant zu Behem, do hatte er vns der durchlewchtigistin furstin der kunigin zu Behemen beuolhen, das wir ir sulden gehorsam sein bis auf sein zukunft. Das haben wir getan vnd hatten irer gnaden gehorsam gelobt zu Prag of dem haws. Dornach als vnsers herrn kuniges gnade was ken Brun komen, do besant vns die kunigin mit irem brifen vnd gebot vns das wir von stund an zu vnserm herrn kunige reiten vnd Im hulden vnd gehorsam geloben als einem behmischen kunige. Das haben wir auch getan. Dornoch sante vnsers herrn kuniges gnade sein Amptlewte zu vns in vnser Stat mit seiner Maiestat brife, dorinne er gebot, das wir In an seine stat sulden hulden vnd sweren als einem behmischen kunige vnd vnserm rechten Erbherrn. Do haben wir gesuoren als vns sein gnade mit seinen brif hat geboten. Darvmme glauben wir vnd getrawen ewern gnaden vol, das ir vns nicht vorubel habt vnd nicht an mutet, das wir von vnserm angeboren Erbhern solden treten. Wann ab wir das teten, so tochten wir furbas nymmermer ewicleichen zu biderleuten. Ouch biten wir ewer gnade, das ir vns dor vmme kein hindernusse tut, noch beschedigt, noch den ewern gestatet das sie vns beschedigen, sundern das ir das in gute lasset sten, das wir mochten das an vnsern herrn kunig brengen. Vnd was vns von seinen Gnaden wirt zu antwort, das wirt euch ouch wol zu wissen. Vnd biten ewer gescriben antwort bei disem boten. Gegeben am mitwoch noch sante Jorgen tag anno domini et cetera XX°. Burgermeister, der rat vnd dye Gemeyne der Stat Cadan et cetera.