Přepis regestovaného dokumentu

Nos Andreas iudex, Martinus Tocznik, pro tunc temporibus magister ciuium, et Olbramus, iurati consules et ciues ciuitatis Nowe Plzne, tenore presencium recognoscimus uniuersis et singulis testificantes, quod prouidus vir Johannes Miliczinecz, noster conciuis, coram nobis ac pleno consilio personaliter constitutus, recognouit, se in et super domo sua aciali et eius area, que est sita in iamdicta nostra ciuitate inter domos Pauli Cunssonis parte ab una, et Blahe Nyslini parte ex altera, ac super omnibus bonis suis mobilibus et inmobilibus, habitis uel habendis, unam sexagenam grossorum bonorum census annui et perpetui pro decem sexagenis grossorum pragensis monete iusto vendicionis titulo vendidisse pro scola, scilicet pro cantore et semiconibus. Quas quidem decem sexagenas grossorum racione testamentalis pecunie pro anima famosi Andree dicti Strhla de Przievieticz delegatas recognouit, se pretactus Johannes Miliczinecz recepisse, promittens prefatus Johannes Miliczinecz bona fide sine quouis dolo malo, suo, heredum et successorum suorum nomine prescriptam sexagenam grossorum census annui et perpetui singulis annis diuisim in terminis infrascriptis censuando soluere, incipiendo in proximo die sancti Georgii mediam sexagenam grossorum, de qua media sexagena grossorum cantor quinque grossos et semikones viginti quinque grossos debent leuare; et in festo sancti Galli inmediate sequenti similiter mediam sexagenam grossorum sine quauis dilacione, de qua media sexagena grossorum iterum cantor quinque grossos et semikones scole nostre viginti quinque grossos debent leuare. Pro quo tamen censu ipse cantor cum semikonibus scole nostre qualibet septimana feria secunda circuitum et post circuitum missam defunctorum cum graduali tractu Agnus dei et communione, uel alio die, si sollempnitas uel festum celebre in ipsa feria secunda occurrerit, pro anima predicti Andre Strhla et pro animabus predecessorum suorum, necnon pro animabus omnium fidelium defunctorum perpetuis temporibus sollempniter cantare, sine omni obmissione debent peragere et tenentur. Et non dato censu cuiuscunque dictorum terminorum termini quocunque anno, mox antedicti, scilicet cantor et semikones, plenam habent et habere debent virtute presencium auctoritatem prefatum Johannem Miliczinecz, heredes et successores suos prenotate domus auxilio iudicis et iuratorum tunc temporis in nostra ciuitate existencium in iamdicta domo in aliisque bonis suis, vbicunque situatis et repertis, impignerandi; et recepta pignera atque ipsam domum inter christianos siue iudeos obligandi uel vendendi et taliter censum non solutum ad plenum conquirendi sine omni iudicii strepitu et querele, hoc tamen expresso, quod si predictus Johannes Miliczinecz aut eius heredes et successores in aliis certis et equiualentibus bonis cum scitu et consensu predictorum, scilicet cantoris et semikonum, unam sexagenam grossorum census perpetui pro decem sexagenis dictorum grossorum et non remissius comparauerit et more consueto confirmauerit, ex tunc ipse Johannes Miliczinecz, heredes et successores sui cum domo sua et aliis bonis erunt a tali solucione census penitus liberi et soluti. Et qui hanc literam habuerit de voluntate sepedictorum cantoris et semikonum, eidem competit ius omnium premissorum. In quorum euidens testimonium et robur valiturum sigilla nostra propria de certa nostra sciencia ad peticionem prefati Johannis Miliczinecz presentibus sunt appensa. Datum et actum anno domini millesimo quadringentesimo tricesimo secundo, in die sancti Martini confessoris et pontificis.