Přepis regestovaného dokumentu

Nos Andreas iudex, Martinus Tocznik, pro tunc magister ciuium et Olbramus, iurati consules et ciues ciuitatis Nowe Plzne, tenore presencium recognoscimus uniuersis et singulis testificantes, quod prouidus vir Johannes Miliczinecz, noster conciuis, coram nobis ac pleno consilio personaliter constitutus recognouit, se in et super domo sua et ipsius area, que est sita in iamdicta nostra ciuitate inter domos Pauli Cunssonis parte ab una et Blahe Nyslini parte ex altera, ac super omnibus bonis suis mobilibus et inmobilibus, habitis vel habendis, unam sexagenam grossorum bonorum census annui et perpetui pro decem sexagenis grossorum pragensis monete iusto vendicionis titulo vendidisse, honorabilibus et religiosis vicariis ecclesie parrochialis nostre, presentibus et futuris, tam religiosis quam secularibus. Quas quidem decem sexagenas grossorum racione testamentalis pecunie pro anima famosi Andree dicti Strhla de Przievieticz delegatas recognouit, se Johannes prefatus Miliczinec recepisse, promittens prefatus Miliczinecz bona fide sine quouis dolo malo, suo, heredum et successorum suorum nomine prescriptam sexagenam grossorum census annui et perpetui singulis annis diuisim in terminis infrascriptis censuando soluere, incipiendo proximo die sancti Georgii mediam sexagenam grossorum et in festo sancti Galli inmediate sequenti similiter mediam sexagenam grossorum sine quauis dilacione. Pro censu ipsi vicarii qualibet septimana feria secunda circuitum et post circuitum missam defunctorum pro anima Andree dicti Strhla et pro animabus predecessorum suorum, necnon et pro animabus omnium fidelium defunctorum cum graduali et tractu Agnus dei et communione perpetuis temporibus sollempniter cantare sine omni obmissione debent collectis impositis, prima videlicet: Omnipotens sempiterne deus, cui unquam sine spe misericordie supplicatur propiciare animabus fidelium tuorum et cetera; et secunda: Fidelium deus omnium et cetera. Si vero sollempnitas siue festum celebre in ipsa feria secunda occurrerit, tunc cum circuitu et missa defunctorum in alium diem adhuc competentem differre debent. Et non dato censu cuiuscunque dictorum terminorum quo tamen termini quocunque anno, mox antedicti vicarii plenam habent et habere debent auctoritatem, prefatum Johannem Miliczinecz, heredes et successores suos prenotate domus auxilio iudicis et iuratorum tunc temporis in nostra ciuitate existencium, in iamdicta domo in aliisque bonis suis, vbicunque situatis et repertis, impignerandi et recepta pignera atque ipsam domum inter christianos siue iudeos obligandi uel vendendi, et taliter non solutum censim ad plenum conquirendi sine omni iudicii strepitu et querele, hoc tamen expresso, quod si predictus Johannes Miliczinecz aut eius heredes et successores in aliis certis et equiualentibus bonis cum scitu et consensu predictorum vicariorum unam sexagenam grossorum census perpetui pro decem sexagenis grossorum dictorum et non remissius comparauerit et more consueto confirmauerit, ex tunc ipse Johannes Miliczinecz, heredes et successores sui cum domo sua et aliis bonis erunt a tali solucione census penitus liberi et soluti. Et qui hanc literam habuerit de voluntate sepe- dictorum vicariorum, eidem competit ius omnium premissorum. In quorum euidens testimonium et robur valiturum sigilla nostra propria de certa nostra sciencia ad peticionem ipsius Johannis Miliczinecz presentibus sunt appensa. Anno domini millesimo quadringentesimo tricesimo secundo, in die sancti Martini confes soris et pontificis.