Přepis regestovaného dokumentu

… Wir sullen auch Brux und Resenborg mit eynander innehabin und bestellen zcu gewynne und verlust, und wir Friderich sollen uff die gnanten sloß redeliche und bederbe amptlute setzen, als offte des noit geschiet, doch mit rate unser aller, die uns dann allen drien gelobin und sweren sollen. Ab auch ymands die gnanten sloß und stete nötigen wolde, daz sullen unser amptlute daruffe andern unsern amptluten, die yn am nesten sitczen, zcuwissin tun und verkundigen; mit den wir bestellen sollen und wollen, wann yn solliche verkundigunge geschet, denselbin unsern amptluten zcu Brux und Resenborg czu helffin und czu volgen mit ganzcer macht. Ap sie auch darinne sümig wurden, dennoch sollen wir herczog Friderich im lande zcu Missen unser lute noch noitdurfft dahin schicken, denselbin dahin geschickten wir andern czwene iglicher noch siner anzcall mit spiße und futter ußrichtung thun und vor schaden stehn sal, biß so lange daz wir die unsern do hin in geschickt hetten, als dann daz irkandt wurde. Deßglichin sullen wir auch wann und so offte des noit geschiet, Freiberg miteynander eyntrechtiglichin bestellen et cetera. … Aldenborg noch Cristi unsers herren geburt, vierzcenhundirt jar und darnoch in dem sechsunddrissigstem jare, am mittewochin noch des heiligen nuwen jaristag.