Přepis regestovaného dokumentu

Scholdige willige dienste mit demuttiger bevelunge czuvor. Allerdurchluchtigiste furste und allirgnedigster herre, als ich euern koniglichen gnaden vorbracht habe czu Bresburg noch undirrichtunge czweier bruder unsers ordens, wi die warnunge gescheen durch etliche gut gunner unsirs ordens, so bein ich am nehest vorgangen sonnobunde gekomen ken Breslaw, also habe ich gefunden den gut gunner und warnesman unsirs ordens, der mir vorczalt hat die czukunftige schikunge des herren konigs von Polan und herczoges Wytawts wedir euwer konigliche gnade, die cristenheit und unsern orden, alzo das des herren konigs von Polan und herczoges Wytawts sendeboten werden einen tag halden in korcze uf dem Taterschen gevielde, gelegen czwysschen Tatern und Ruysschen, wi wol der herre konig von Polan und hertzog Wytawt dar in eigenen personen nicht komen wellen, uf das sei dorinne nicht sollen gemerket werden, aldo werden vil geczunge der heidenschafft czusammen komen, und die czusammenkomunge geheissen ist von den heiden zam ein concilium, alzo das der herre konig von Polan und herczog Wytawt dissen somer nicht vormogen grosse heidenschafft in herferthen czu furen, abir den andern czukunftigen somer wellen sei czwei heere, eins ken Pruyssen, das ander in die Sleisie usrichten mit der hulffe der hussen, uf das die Slesie mechticlichen obirfallen werde und obirczogen, und hoben ouch der vorgenante koning und herczog Wytawt grosse gaben gesandt dem Turken, die gaben der obenberurte warnesman gesehen hat, als her spricht, uf das die Turken euwer grosmechtige koningliche und die euwern mit krige deheime behalden sollen, und das sey iren willen czu schaden euwern koninglichen gnaden, der cristenheit und czu vorstoren unsern orden mogen volbrengen, do dach got vor sei. Dorumbe demuticlichen ich biete euwer allirdurchluchtigeste koningliche gnade, das sei geruche eins sotanes czu herczen erntstlichen czu nemen und setczen unsern orden in einen ewigen bestendigen frede mit den herren koninge von Polan, herczog Wytawt und iren landen, wanne ich das vor das beste euwir gnaden, der cristenheit und unserm orden irkenne noch gestaltnisse der sache, das einer ewiger bestendiger frede das beste sei, also ich das euwern gnaden das ouch zu Preszepurg vorczalt habe, wanne geschee dis nicht und euwer koningliche hulffe und schickunge ouch nicht vulbracht und vulfurt wurde, wanne ich vornomen habe von den sendeboten des landes czu Sachssen, das der herre marggraffe von Brandenburg das land czu Sachssen bis an euwer gnade inneheldet, dach so meinten die selbigen sendeboten, das sei blieben welden bey dem vorgenanten herren marggraff in czu behalden vor eynen herren, alzo mochte villichte eyn wedirstos komen in den dienst unsern herren von Missen von euwern koninglichen gnaden unserm orden ufgeleit. Queme unsir orden nicht czu frede, do got vor sei, und wurde euwer koningliche hulffe unserm orden gnediclichen ufgeleit ouch entczogen, so wurde die cristenheit gros geswechet und unsir orden dorumbe vortreben und grundlichen vorterbet, do dach euwern gnaden deme heiligen romisschen riche und dem cristenthum gruntliche vorterpnisse dovon enstehen mochte, dorumbe geruche euwer gnade eins sotanes undirsteen und dorinne das beste czu thun, als das in euwer gnade demuticlichen gesatezt ist, die selbige personeliche gnade beware der almechtige got gnediclichen gesund czu allen czieten. Gegeben czu Breslaw am donnerstage vor purificationis Marie im xxiij^ten jare.

Item ein czeddil. Ouch geruche czu wissen euwer allirdurchluchtigeste koningliche gnade, das ich von gewissen redlichen luethen vornomen habe, wi der herre koning von Polan und herczog Wytawt ire trefliche botschaffte haben czu dem keiser von Tateren und ouch den Turken ufgerichtet, nemlichen hat herczog Wytawt seinen russchen schrieber in der selbigen botschafft czu teidingen und czu machen uf drie jare einen freden czwisschen den Tatern und Turken, so haben der herre koning von Polan und herczog Wytawt vullemacht des keysers von Tatern czu teidingen und czu machen den selbigen beifrede mit den Turken, ab die Turken villichte nicht wellen angehen und ufnemen den vorbenumpthen beifreden, sol wil dach herczog Wytawt mit sinen gaben und ganczen fliesse, alzo her uf das hochste mag erbeiten, czu wege brengen, das der beyfrede ufgenomen und volendet sal werden, uf das die Turken euwer koningliche gnade und lande sollen obirfallen und der koning von Polan und herezog Wytawt mit den Tatern das land czu Pruyssen und die Slesie. Ouch habe ich von den obenberurten gewissen luthen vornomen, das Siszko, der hussen howptman, gros gut gesand habe den Venedigeren und her mit sines selbes personen cziehen wirt czu den Venedigeren, und also do sei des vorgenanten Siszko des ketczers czukunft vornomen, do haben sei sich gefrowet und frowen sich tegelichen der selbigen czukunft; ouch so vorneme ich gewislich, das der herre marggraffe von Brandenburg sine treffliche botschafft wil senden und in korcze haben bei dem herren koninge czu Polan und mag hers usrichten, das her selbir czien moge mit synes selbes persone, das wil her gerne volenden, idach ist bereit dei botschafft vor sich czu cziende czum koninge czu Polan. Noch dissen vorgeschrebenen czietungen mag sich euwer koningliche gnade gwislichen richten, wanne sie worden mir von gwyssen redlichen luethen als hewten czu wissen, und was ich furbas gwislichen mag dirfaren, das wil ich allis euwern koninglichen gnaden vorschrieben und dorinne keines vorswigen. Das glichen haben wir ouch Hanszen Stertczen, burgermeistern czu Kolme, geschreben, uff das er sich noch sotanen czitunge wisse czu richten und unsern herren romeschen koning irmanen und anlegen, das seine gnade unsern orden setcze in einen fred.