Přepis regestovaného dokumentu

Eodem die ut supra ist vor uns komen Hanns Glazer und hat uns gebeten einen brieff in unser statbuch lossen schreiben, der do laute von worte zu worte, als hyenach geschreben stet: Wir ratmanne der stat Breslaw bekennen und tuen kunt offinlichen mit desem brive allen, die in sehen adir horen lesen, das vor uns in sitczendem rate komen ist der erber Jorge Greyser messrer unser mitburger und hat abegetreten, offgereicht und zugeeygnet Hannsen Glazer und Sigmunden Pfol sein erbe und haus, das her zu Prage hat und in dem her eczwenn gewonet hat, gelegenin der gassen, als man zu sante Egidien geet, czwischen Blasius messrers und des Czepan messrers erben gelegen, mit allem rechte, als her das vor czeiten gehabt und besessen hat, also das sie dasselbe erbe haben, besitczen und des, wenn in Got dohen gehilffet, gebruchen sollen zu irem besten nütcze und fromen. Geben undir unser stat offgedruckten ingesigel an sante Francisci tage anno Mo CCCCo XXVIto.