Přepis regestovaného dokumentu

In nomine Domini amen. Nos Nicolaus Dei gracia abbas monasterii sancte Marie in Waltsassen, ordinis cisterciensis, Ratisponensis diocesis, ad universorum Christi fidelium tam spiritualium quam secularium cuiuscumque status, dignitatis, ordinis, preeminencie, gradus et condicionis exteterint ad quos pervenerint deducimus noticiam, quod constituti personaliter coram nobis prudentes et circumspecti viri magister civium et consules, iurati opidi in Egra dicte Ratisponensis diocesis suo et tocius communitatis nomine quasdam litteras serenissimi principis et domini domini Karoli dive memorie divina providencia sacri Romanorum imperii imperatoris quarti et Boemie regis sigillo imperialis maiestatis magno rotundo de cera alba comuni in pressulis filorum sericeorum nigri et glauci coloris pendenti sigillatas nobis exhibuerunt et presentarunt, quas vidimus et legimus sanas et integras non abolitas, non rasas, non cancelatas, non viciatas, non corruptas nec in aliqua sui parte suspectas sed omni vicio et suspicione carentes, petentes per nos dictas litteras in scriptis redigi, transcribi et transsumi mandari, ut eisdem litteris tam in iudicio quam extra plena et credula adhibeatur fides, quorum quidem magister civium et cosulum, iuratorum peticionibus tamquam iustis et racionabilibus favorabiliter annuentes et inclinati auctoritate iuris suffulti memoratas litteras in scriptis redigi, transcribi et transsumi fecimus et mandavimus, ita videlicet, quod in huiusmodi transumpto nil addatur vel minuatur, quod sensum mutet vel variet intellectum, quarum litterarum imperialium tenor per omnia sequitur et est talis: In nomine sancte et ... Verum quia sollerti ausculcacione de presenti transsumpto ad litteras originales per nos facta comperimus huiusmodi transsumptum cum dictis litteris originalibus per omnia concordare. Ideo illud in fidem et testimonium omnium premissorum sigilli nostri appensione iussimus comuniri. Datum et actum in Egra anno Domini millesimo quadrigentesimo tricesimo primo, indictione nona, die vicesima septima mensis Februarii.