Přepis regestovaného dokumentu

In nomine Domini amen. Nos Nicolaus Dei gracia abbas monasterii sancte Marie virginis in Waltsassen, ordinis cisterciensis, Ratisponensis diocesis, ad universorum Christi fidelium tam spiritualium quam secularium cuiuscumque status, dignitatis, ordinis, preeminencie, gradus et condicionis extiterint ad quos presentes pervenerint deducimus noticiam, quod constituti personaliter coram nobis prudentes et circumspecti viri magister civium et consules, iurati opidi in Egra dicte Ratisponensis diocesis suo et tocius communitatis nomine quasdam litteras serenissimi principis et domini domini Ludovici felicis recordacionis divina providencia sacri Romani imperii imperatoris quarti sub aura bulla typario imperialis maiestatis magno rotundo in pressulis filorum sericeorum ruffi et glauci coloris impressa nobis exhibuerunt et presentarunt, quas vidimus sanas et integras non abolitas, non rasas, non cancellatas, non viciatas, non corruptas nec in aliqua sui parte suspectas sed omni vicio et suspicione carentes, petens per nos dictas litteras inscriptis redigi, transcribi et transsumi mandari, ut eisdem litteris tam in iudicio quam extra plena et credula adhibeatur fides, tamquam litteris originalibus prenominatis quorum quidem magister civium et cosulum, iuratorum peticionibus tamquam iustis et racionabilibus favorabiliter annuentes et inclinati auctoritate iuris suffulci memoratas litteras in scriptis redigi, transcribi et transsumi fecimus et mandavimus, ita videlicet, quod in huiusmodi transumpto nil addatur, vel minuatur quod sensum mutet vel variet intellectum, quarum litterarum imperialium tenor per omnia sequitur et est talis: Ludovicus quartus ... Verum quia nos Nicolaus abbas supradictus sollerti ausculcacione de presenti transsumpto ad litteras originales facta comperimus huiusmodi transsumptum cum dictis litteris originalibus in toto et per omnia realiter concordare et non discrepare. Ideo in evidentem fidem et testimonium omnium et singulorum premissorum presens transsumptum fieri fecimus et sigilli nostri appensione iussimus comuniri. Datum et actum in Egra anno Domini millesimo quadrigentesimo tricesimo primo, indiccione nona, die vicesima septima mensis Februarii.