Přepis regestovaného dokumentu

Wir Friderich und Sigmund gebrudere von gots gnaden herczogin zcu Sachssin lantgraven in Doringen und marcgraven zcu Missen bekennen fur uns, unsere libin brudere und erbin und thun kund offinlichin mid dissem brive allen den, die yn sehin, horen adir lesin: das wir von sullicher rechenunge wegin, die uns der gestrenge Brosius von Hogeniste von des amptis wegin, das er von unser wegin zcu Brux etwelange innegehabt und uns wedir geantwert had, an den gnanten Brosius vom Hogenist, frouwen Dorothean syn wib, Hansen sinen vettern unde erbin sulliche hinderstellige rente und zcinse mid namen hundirt und fumff schog, die von unser stad zcu Brux nicht gefallen noch beczalt sind, mid namen, die diezciit, als er das ampt innegehabt had, gewiset habin und wisen an yn, sinen vettern unde sine erbin und wib die in craft disses brives die von unsern wegin inczufurdirn, zcu manen und die noch siner notdorft ußzculegin und sullicher bescheidinheit. Wurde er die zcuwusschin hir und wynachtin schirstin nicht ermanen, so sollin und wollin wir ym sulliche obingeschrebin summe uf die egnanten winachten selbir gutlichin ußrichten und beczalen. Czu orkunde habin wir herczog Friderich unser insigil, des wir Sigmund auch herczog mitte hirane gebruchin, wissenlichin undene an dessen brieff lassin drucken. Gegeben zcu Orlaminde am sonnabend och Jacobi anno domini MCCCCXXXV.