Přepis regestovaného dokumentu

Ich Hanns Hannaper von Olmuncz burger zu Wienn vergich für mich und all mein erben und tun kund offenleich mit dem brief, allen den er fürkümbt, daz uch mit gutem willen und wolbedachtem mut zu der zeit do ich das wolgetun mocht, verkaufft hab mein mül und den hof gelegen zu Olmůncz vor der stat, genant des Vector můl, und alles das darczu gehöret, holden, püsch, ekcher, gült und grüntt es sei gestifft oder ungestifft, versucht oder unversucht, wie das genant oder wo das gelegen ist nichts hindan gesaczt, sunder alles hie inne beslossen, dieselben mül und den hof, und was darczu gehöret als jecz berurt ist, hab ich recht und redleich verkaufft und geben mit allen den nůczen und rechten eren und zugehörungen, als ich die inngehabt genüczt und genossen habn und von alter stein herkommen umb vierhundert und dreissigk markch gross mërerischer zal, der ich gancz und gar verricht und gewert pin, dem erbern und weisen Lucasen dem Salczer, und seinen erben fürbas die vorgenanten mül und den hof, mit allen iren zugehörungen als vor begriffen ist ledig kleichen und freileichen innczehaben zenuczen und zeniessen und allen irn frumen famit, zeschaffen mit verkeuffen, verseczen, schaffen, machen und geben, wem sy wellen an mein und meiner erben irrung und hundernüss, und verczeihen uns auch derselben mül und des hoffs mit allen iren zugehörungen, wissentleich mit krafft des briefs, das wir nu furbas darczu chain ansprach noch gerechtigkait nicht mer haben süllen noch wellen weder mit recht noch an recht, vil noch wenig in chamerlai weis an alles geuer, beschech aber das dem egenanten Lucas Salczer und seinen erben von mir oder meinen erben icht krieg oder ansprach daran anferstünd inn jarsfrist, des pin ich obgenanter Hannaper mit meinen erben, willigkleich zu verantwurtten als es denn vorgeschriben stet, des zu urkund gub ich für mich und all mein erben dem egenanten Lucasen Salczer und seinen erben den brief versigilten mit meinem anhangundem insigil der sach ist gezeug durch meiner vleissigen pet willen der erber Ulreich Hirssawer statschreiber ze Wienn mit seinem anhangundem insigil, im und sein erben an schaden, geben zu Wienn an mittichen vor sand Larenczen tag nach Kristi gepurd vierczehenhundert und darnach in dem sechsunddreisigisten jaren.