Přepis regestovaného dokumentu

Ad noticiam uniuersorum tam presencium quam futurorum publice cupio devenire, quod ego Johannes de Petrowicz sana et salubri mentis deliberacione amicorumque meorum sufficienti usus consilio quatuor laneos minus quartali censuales ibidem in Petrowicz quinque sexagenas grossorum argenteorum monete Pragensis annuatim in hominibus infrascriptis, videlicet in Symone de medio laneo quadraginta grossos et quinque cum medio denarios Vienensses censuanti, in Ssichone de medio laneo similiter 40 grossorum et quinque cum medio denarios soluenti, in Barthussone de quartali viginti grossorum et duos denarios annuatim porrigenti, in Mikssone de medio laneo 40 grossorum et quinque cum medio denarios asignanti, in Medykone de medio laneo totidem grossorum et denarios danti, in Maczkone de medio laneo totidem, in Mikssone siluano de medio laneo totidem, et in Thoma de medio laneo triginta quinque grossorum et duos denarios annuatim eciam censuanti. Ipsos homines pretactos cum agris omnibus cultis et incultis, siluis, rubetis, pratis, pascuis, communitalibus, utilitatibus, prouentibus, emendis, devolucionibus et berna ac pleno dominio ad iam dictos laneos, prefatos homines spectantibus, prout egomet hucusque eosdem possedi actenus et tenui, nichil mihi iuris, proprietatis seu dominii in eisdem laneis ac hominibus reseruans vendidi hereditarie iusto vendicionis titulo discreto domino Nicolao sacerdoti de Chwalssin, tunc plebano de Zahaii et capellano beate virginis Marie in Crumpnaw, pro sexaginta sexagenis grossorum argenteorum monete Pragensis, quas in paratis pecuniis me ab ipso fateor recepisse. Quos quidem laneos ac homines cum censu ac utilitatibus eorum uniuersis et singulis ad eos pertinentibus et spectantibus ego Johannes prefatus de Petrowicz et nos Bohuslaus de Petrowicz, Brus de Zahradka, Odolen de Komarzicz alias de Slowkow, fideiussores et disbrigatores predicti Johannis, de bona et sincera fide sine dolo manu coniuncta in solidum et indiuisa predicta bona et eorum omnes utilitates iure regni Bohemie a quolibet homine, cuiuscunque status ac condicionis extiterit, ea inpetente seu inpetere volente et specialiter ab omnibus iudeis et orphanis, dotaliciis et prescripcionibus disbrigare spondemus et sufficientissime libertare. Sin autem prescripta cum eorum censibus et utilitatibus uniuersis bona quouis modo disbrigare et ad plenum libertare non possemus, extunc tenemur et promittimus de tot et tantis hereditatibus et censu prenominato in nostris liberis, propriis, mundis, bene obsessis et eque bonis prefato domino Nicolao condescendere tercia parte superaucta, prout in talibus in terra et regno Bohemie fieri actenus est conswetum. Quod si non fecerimus, tunc mox duo ex nobis predictis, qui primum per nominatum dominum Nicolaum ore, nunccio uel littera moniti fuerimus, nullus nostrum se per aliorum excusans absenclam nec super alium indicans, quilibet cum uno famulo et duobus equis debemus et spondemus ingredi ciuitatem Crumpnaw ad honestum hospicium nobis per prefatum dominum Nicolaum ostensum ad prestandum ibidem obstagium debitum et conswetum, inde super nullo iure exituri, nisi prius prescripto domino Nicolao de totidem hereditatibus et tanto redditu per nos extiterit condescensum, eciam tercia parte superaucta. Elapsis autem ab amonicione obstagii nobis facta diebus quatuordecim continuis prestito per nos uel non prestito huiusmodi obstagio et non condescensis per nos hereditatibus et redditu, ut prefertur, plenam pretacto domino Nicolao virtute presencium damus et concedimus potestatem, sexaginta sexagenas capitales, quas pro sepetactis hereditatibus et censu exposuit, similiter parte tercia adaucta eciam cum omnibus et singulis dampnis ob hec quomodocunque perceptis et racionabiliter demonstratis, recipiendi et conquirendi inter christianos uel iudeos nostrum omnium super dampna, nobis in huiusmodi nichilominus super obstagio continuantibus, donec supradicto domino Nicolao omnibus et singulis satis faceremus. De premissis hoc eciam notabiliter adiuncto, quod prefatus dominus Nicolaus non conpulsiue nec violenter sed ex speciali gracia et favore mihi prefato Johanni aut meis heredibus assensum et liberam voluntatem eius prebuit, quod predictas hereditates cum censu eorum a data presencium in spacio quatuor annorum a festo sancti Georgii inmediate sequencium pro eadem summa pecuniarum ab ipso libertare et reemere unacum heredibus meis possin et valeam, difficultate et controuersia cuiuslibet hominis proculmotis censum sancti Galli uel sancti Georgii circa exsolucionem sequentes cum ipsis pecuniis porrigendo. Si vero in prescriptis quatuor annis prefata bona ego prefatus Johannes uel mei heredes non libertarem uel nec reemerem, tunc prefata bona cum censu ipsorum in proximis quatuor temporibus, ac si in illis sine dolo fieri non posset, tunc in secundis quatuor temporibus inmediate post prescriptos quatuor annos sequentibus cum bonis et certis disbrigatoribus sub superius tacto obstagio ad tabulas regni Bohemie quauis renitencia et controuersia postposita tenemur et promittimus intabulare. Si autem tabule regni Bohemie, priusquam bona prescripta in census prefatos, ut premittitur, disbrigaremus et intabularemus, quomodolibet deperirent, uel ad eos propter deordinaciones tunc vigentes libere non pateret accessus, extunc promittimus, tenemur et debemus agros in census prefatos cum omnibus iuribus et pertinenciis mox creditori nostro sepe memorato firmare et roborare, incorporare et inviscerare modo et ordine, qui tunc inter dominos et armigeros regni Bohemie tenetur et obseruatus erit in talibus et hoc tempore prenotato uel sub obstagio prenominato. Ceterum si, quod absit, aliquem ex nobis medio tempore ante annos disbrigacionis et reempcionis et intabulacionis, quod deus auertat, ab hac luce migrare contigerit, tunc nos residui et superstites tenemur et spondemus, alium eque certum et habentem in locum illius defuncti uel illorum defunctorum in spacio et reuolucione unius mensis continui a die illius uel illorum obitu statuere et substituere nobiscum ad premissa compromittentem cum innouacione de verbo ad verbum presentis littere sub pena obstagii per omnia ante dicti. Et quicunque hanc litteram de consensu et voluntate sepe fati domini Nicolai habuerit, eidem jus conpetit omnium premissorum. In quorum euidenciam, roboramentum et certitudinem firmiorem sigilla nostra propria de certa nostra sciencia presentibus sunt appensa. Sub anno domini M^o quadringentesimo tricesimo sexto, dominica ante festum sancti Georgii mart.