Přepis regestovaného dokumentu

Ich Jann von Rachaw und meine erben selbschuld Jann Beranko von Petrowicz, unser purge und mitglober, bekennen und tun kunt allen die diesen brieff sehen oder horen lesen, kegenwortigen und zukunftigen, das wir recht und redleich vorkauft haben dem erbern Procop Schrammen von der Ygla ein schok grossen prager munze und gulde auf dem dorf Janowicz umb zehen schok grossen, die wir mit beraitem gelde von im ganz und gar haben enphangnen und eingenomen dasselbe schok grossen globen wir im dem Procop Schrammen in guten treuen an arg das ist dreissig grossen auf sant Jorigentag nechst kumende anzuheben und dreissig grossen auf sant Gallentag daruch schirist volgende und also furbas alle jar jerlichen auf dieselbe tege mit guten beraiten grossen an hindernusse richten geben und bezalen sullen, ab wir des nicht enteten do got vor sei, so mage und sol der vorgenant Procop Schram oder wem er dasselbe schok grossen zinses geben oder beschiden wurde unserer leute aufhalden fur seine vorsessne zinse auch mag der egenant Procop Schram dem obgenanten zins vorsezen oder vorkaufen ab im des notgeschee in dem obgenanten gelde in allem rechten als er im vorkauft ist mit craft diz briefs, die weil wir oder unser erben im oder wem er den zins vorkaufte die obgenanten zehen schok grossen richten oder bezalten und wer sach das der obgenant Jann Beranko, purger und mitglober, abging mit dem tode undenselben zeiten, so globen wir obgenanten selbschuld einen andern purger also guten und also namhaften zu uns sezzen und unterschreiben in dem nechsten moneid noch desselben purgls verschiedung under der pus unserer treu und eren und wer den brief mit rechter wissen und gutem willen des obgenanten Procops inen haben wirt, der sol haben alle die recht die obgeschriebensteen und das wir alle obgeschribne rede stet ganz und unveruckt halden sullen und wellen des habe ich erstgenanter Jann von Rachaw mein sigel und der erhafte Jann Beranko von Petrowicz auch sein sigel neuen mit zuurkunde und pessz sicherheit an den brief lassen hengnen. Der geben ist nach Cristi gepurt vierzehenhundert jar dornach in dem dreisigstem dritten jare an sunabende noch Bartholomei des heiligen zwelfpoten.