Přepis regestovaného dokumentu

Als Hannus Fleisscher von der Kempnicz eine meile von der Gabele gelegin, der seinen zuhalt eczliche zeit zum Luban gehabit habit, in der stad haften wart ufgenomen von Heinrich Newgebauwers wegen des burgermeisters zum Lauban umbe eczliche rede wille, des der egenante Hannus Fleisscher in beret sulde haben, nemlich das die keczer mit demselben Fleisscher dem burgermeister und rat zum Luban empoten sulden haben, herrn Bernhard von Nuchtericz nicht by in zu halden, das er deme burgermeister egenant sulde haben gesagit und der is an den rat furder nicht brocht hette, und so der burgermeister vorgenant den obgenanten Fleisscher vor den scheppin alhie schuldigite, her wuste anders nicht im under augen, denne das her sy verroten hette, das sie sulche scheden entphangen hetten und in den zween zogen so gruntlich von den keczern verterbit weren. Und so hat Peter Cuncze, Hannus Weider, Langenickel et cetera mit andern herrn des rates do zwischen beiden teilen geret, das ein teil das andere von der sache wegen nymmer argen sal und sullen gute frunt sein, doruff einer dem andern dy hende geben haben. Und so hat der vorgenante Fleisscher dorober ein orfrede gesworn, als orfrede recht, weder hie von der stad wegen zu Gorlicz umbe des gefengniss wille noch zum Luban von der egenanten sachen wegen nymmer mehe feden, anlangen sal noch nymanden von sinen wegen. Actum feria 2. post Johannis baptiste anno 31.