Přepis regestovaného dokumentu

Hannus von Polentz, vorweser der Sechs lande und stete Budissen et cetera und voyt zu Lusitz, den gestrengen und irsamen landen und steten Budyssin, Gorlitz, Zittaw, Luban, Lobaw und Kamentz et cetera. Ich wer gern hy by uch gewest uff dysim tage, als habe ich so mancherleye botschafft ussen, dy mir en teils als morgen by tage und en teils by nachte kommen sol, das ich forchte, das ich uch und mich vorsümen möchte et cetera. Libin herren und frunde, als ir mir denne globit, vorheissen und vorschrebit habit 400 pferde under uch zu setzen dy myr noch myner vorbotunge kommen solden et cetera, bitte ich uch libin fründe, das ir daran syt et cetera, und das ouch dyselbin 400 pherde wol besatzet sin mit redelichen schützin und guden wepenern et cetera zwischen hy und dysim nest kommenden dinstage von ubir acht tage, als der solt gefallin sol. Geschege das nicht, libin fründe, so sullit ir wissen, das ich darobir so nicht gesetzen noch blicken kan et cetera. Ouch weder die herren von den steten uff denselben dynstag obir acht tage die soldener bezalen, dornoch obir 14 tage gebört es den mannen et cetera. Gegeben zur Sittaw am sunabende vor Matthei.