Přepis regestovaného dokumentu

Nos Andreas iudex, Johanco, pro tunc magister ciuium et Procopius Fegal, iurati consules et ciues ciuitatis Nowe Plzne, tenore presencium recognoscimus uniuersis et singulis testificantes, quod prouidus vir Nicolaus dictus Pelhrzim sartor, noster conciuis, coram nobis ac pleno consilio personaliter constitutus recognouit, se et suos heredes atque successores, sue domus possessores, site in nostra ciuitate inter domos Wenceslai Pabianconis ex una et Procopii institoris parte ab altera, in et super eadem domo et eius area ac in omnibus bonis suis mobilibus et inmobilibus habitis uel habendis, unam sexagenam grossorum bonorum pragensis monete census annui et perpetui pro decem sexagenis monete pretacte vere vendicionis titulo vendidisse religiosis fratribus, gardino et toti conuentui fratrum minorum, ordinis sancti Francisci in nostra ciuitate habitancium. Quas quidem decem sexagenas grossorum racione testamentalis pecunie pro anima famosi Andre dicti Strhla de Prziewieticz delegatas, recognouit se recepisse; quam quidem sexagenam grossorum pretactus Nicolaus Pelhrzim promisit bona fide dare et eius heredes et successores tenentur et debent ipsis gardiano et fratribus iamdictis singulis annis a data presencium continuis et perpetuis temporibus diuisim consuando soluere, videlicet incipiendo in proximo die sancti Galli mediam sexagenam grossorum et in festo sancti Georgii deinde proxime sequenti similiter mediam sexagenam grossorum. Pro quo tamen censu ipsi sepetacti fratres perpetuis temporibus quatuor anniuersaria in vigiliis et missa pro anima ipsius Andree dicti Strhla et in remedium animarum antecessorum suorum singulis annis perpetue sine intermissione cum scitu commissariorum debent peragere. Et non dato censu cuiuscunque dictorum terminorum termini quocunque anno, mox antedicti fratres plenam habent et habere debent auctoritatem prefatum Nicolaus Pelhrzim, heredes et successores suos prenotate domus auxilio iudicis et iuratorum tunc temporis in nostra ciuitate existencium in iamdicta domo in aliisque bonis suis, ubicunque situatis et repertis, impignerandi et recepta pignera atque ipsam domum inter christianos siue iudeos obligandi uel vendendi et taliter non solutum censum ad plenum conquirendi sine omni iudicii strepitu et querele, hoc tamen expresso, quod si predictus Nicolaus Pelhrzim aut eius successores in aliis certis et tam equiualentibus bonis cum matura deliberacione et consensu predictorum fratrum unam sexagenam grossorum census perpetui pro decem sexagenis dictorum grossorum et non remissius comparauerit et mora censu penitus liberi et soluti et qui hanc literam habuerit de voluntate sepedictorum fratrum, eidem competit ius omnium premissorum. In quorum euidens testimonium et robur valiturum sigilla nostra propria de certa nostra sciencia ad peticionem ipsius Nicolai Pelhrzim presentibus sunt appensa. Datum et actum anno domini millesimo quadringentesimo tricessimo secundo, in vigilia sancte trinitatis.