Přepis regestovaného dokumentu

Den erbern in weisheit fursichtigen burgmeister und rate der stat zü Nuremberg, unsern lieben herren und guten freunden.

Erben in weisheit fursichtige lieben herren und besunder gunstige freunde! Unser behegliche freuntliche dinst wißt alczeit willig voran bereit. Uns haben unser gut freunde, die von Brux von unsers gnedigisten herren, des Römischen et cetera künigs wegen geschriben, als wir euch ein abschrift hie mit senden, als ewr freuntschafft wol vernemen wirdt, auch als ewr liebe als wir meinen vor wol mag vernomen haben wir die hussen in Pilsner, Tachawer und Myser kreyse so mechticlichen geregiert und Lutitz, die stat an dem heiligen ostertag gewannen und syben früm priester de verbrant, und die burger daselbst und bey hundert reysigen dewtschen gesellen, die da lagen, gefangen und hin gefurt und die statmawr daz mererteyl der nydergelegt und die stat gar ausgeprannt haben, und darnach das sloss Gutenstein auch gewannen, bey anderhalb hundert reysige gesellen darauf gefangen und auch hinweg gefurt haben; und darnach komen sie fur die Myse und lagen da vor einem mittemtage bis czu dem andern und namen auch etwas scheden daselbst. Darnach czügen si fur Bischoffsteyncz, und also machten die herren und stette desselben kreyses ein sammnunge und darczü wir unser vermügen bey achthundert güts volks und steinpüschsen, hantpuchsen und tarraspuchsen auch sandten, und also daz bey X^m guts volks czü röss und czü fusse czüsamen komen, und wolten die hussen bestritten haben; und als die hussen daz also vernamen, daz das here köm und mit in streiten welte, da fluhen und wurden sie flüchticlich hinweg in die stete, gen Tawst, Glataw, Prage, Sacz, Lawn, Slahen und yederman heym, dannen er komen was und wolte des streytes nicht erpeyten, und dennoch haben die auz dem stettel Bischofsteincz der hussen bey III^c oder mer erslagen oder erstochen, als die hüssen an sie sturmeten, und meynten sie auch czü gewynnen, und das alles tün wir euch in guter freüntschaft also czü wissen. Und also sie die unsern ieczund aber bey XIIII tagen czü Beheim gewesen und sein ieczund am dornstag nach Johannis ante portam latinam wider heim czü uns komen, und wie es die hussen furbaz anfahen werden, das künnen wir nich gewissen, denn das wir armen lewte an dem orte alczeit in sulchen grosser muhe und arbeit und sweren sorgen siczen, wenn die hüssen komen und uns verderplich scheden czüfügen. Geben am freitag nach Johannis ante portam latinam, anno domini et cetera XXII^°.

Der rat czü Eger.